థాంక్స్

ఇటీవలె కూడలి నుంచి ఈమెయిలు వచ్చింది. నా బ్లాగ్ ను కూడలి లో చేర్చారని.
నాకు కూడలి ని పరిచయం చేసి, నా బ్లాగ్ ను కూడలి కి పంపేలా ప్రోత్సహించిన 
 శ్రీదేవి గారికి ఈ సందర్భంగా ధన్యవాదాలు తెలియజేసుకుంటున్నాను. 

కలసి పనిచేసి (ఈటీవి లో) దాదాపు 14 సంవత్సరాలైనా , నేను బ్లాగ్ ఓపెన్ చేసి, రాయడం మొదలు పెట్టానని 
 తెలిసి ప్రోత్సహిస్తున్న విజయ్ కుమార్ (ఆయన జర్నలిజం స్కూల్ లో నాకు సీనియర్ , ప్రస్తుతం  "జర్నో ముచ్చట్లు" బ్లాగ్ నిర్వాహకులు)గారికి మెనీ థాంక్స్.

అమెరికా లో ఫాల్ కలర్స్

ఈ సంవత్సరం సెప్టెంబర్ 22 నుంచి ఫాల్ / ఆటం మొదలైంది. ఈ కాలం లో చెట్లు తమ ఆకుల రంగులను క్రమ క్రమం గా మార్చుకుని చివరికి రాలి పోతాయి. అందరికీ తెలిసిన విషయమేగా , ఇందులో కొత్తేముంది అనుకుంటున్నారా? అక్కడికే వస్తున్నా- చిన్నప్పుడు సైన్సు క్లాసు లో చదువుకునే ఉంటాం ఫోటో సింథసిస్ గురించి.మరోసారి గుర్తు చేసుకుందాం. 

చెట్లు తమ వేళ్ళ ద్వారా భూమి లోని తేమనీ , పర్యావరణం లోని కార్బోన్ డై ఆక్సైడ్ ని గ్రహిస్తాయి. సూర్యరశ్మి ని ఉపయోగించి తేమనీ , కార్బోన్ డై ఆక్సైడ్ నీ, ఆక్సిజన్ , గ్లూకొస్ లు గా మార్చు కుంటాయి. ఈ ప్రక్రియనే ఫోటో సింథసిస్ అంటారు. ఫోటో సింథసిస్ జరగడానికీ, చెట్ల ఆకులు ఆకు పచ్చ గా ఉండడానికీ క్లోరోఫిల్ అనే రసాయనం ప్రధాన కారణం. (కింది ఫోటో చూడండి).

ఫాల్ / ఆటం లో చెట్ల ఆకుల రంగులో మార్పెలా వస్తుంది?

ఎలాగంటే, ఎండాకాలం అయిపోయి, ఆకు రాలే కాలం వచ్చిన తర్వాత, పగటి పూట ఎండలో తీక్షణత  తగ్గుతూ వస్తుంది. తగినంత సూర్యరశ్మి లేకపోవడం వల్ల ఫోటో సింథసిస్ ప్రక్రియ మందగిస్తుంది. తద్వారా చెట్ల ఆకులు ఆకుపచ్చ రంగును కోల్పోయి, పసుపు, ఎరుపు, వంగ, నారింజ రంగుల్లోకి మారతాయి. ఇవ్వాళ మా ఇంటి దగ్గర కొన్ని చెట్ల ఫోటో లు తీసాను. చూడండి రంగులు ఎలా ఉన్నాయో. 

ఇండియా లో ఉన్నప్పుడు , ఇన్ని రకాలుగా ఆకులు రంగు మారడం ఎప్పుడూ చూడలేదు. బహుశా, ఉష్ణోగ్రతల్లో పెద్ద తేడాలు ఉండక పోవడం కూడా కారణమై ఉండొచ్చు.

 ఉష్ణ ప్రాంతాలైన దక్షిణాది రాష్ట్రాల్లో ఎండా కాలానికీ, ఆకురాలే కాలానికి మధ్య ఉష్ణోగ్రతా భేదాలు ఎక్కువగా ఉండవు.

 

అమెరికా లో, వీకెండ్స్ లో ఫాల్ కలర్స్ చూడడానికి వెళ్ళడం ఒక ఆట విడుపు. కొన్ని వందల మైళ్ళు డ్రైవ్ చేసుకుని వెళ్లి , కలర్స్ చూసి వస్తుంటారు. మా ఊరికి దగ్గర్లో "గ్యాటలిన్ బర్గ్ " అనే ప్రాంతం, ఈ ఫాల్ కలర్స్ కి బాగా ప్రసిద్ది.  మళ్ళీ డిసెంబర్ 21 నుంచి చలికాలం మొదలవుతుంది. మంచు, చలి. అదొక అందం. 

                            (ఈ ఫోటో, లూయీవిల్ కు దగ్గర్లోని " బెర్న్ హైమ్ ఫారెస్ట్  " లో  తీసింది. )  


ప్రకృతి సృష్టించే ఈ రంగుల కాన్వాస్ ను, పునఃసృష్టి చేయడం, ఎంత చేయి తిరిగిన చిత్రకారుడికైనా అసాధ్యం అంటే అతిశయోక్తి కాదేమో!

చెట్లన్నీ కొట్టేస్తే, ముందు తరాలకు ఈ అందాలన్నీ దూరమైపోతాయి.
మరి మీ వంతుగా మొక్కలను నాటి, పర్యావరణ సమతుల్యానికి పాటుపడతారు కదూ?

ప్రయత్నించండి.

~ శశిధర్ సంగరాజు.

 

దసరా శుభాకాంక్షలు .

నా బ్లాగ్ ను సందర్శిస్తున్న  మిత్రులందరికీ , విజయదశమి శుభాకాంక్షలు. 

~ శశిధర్ సంగరాజు.

అమెరికా లో డాక్టర్ అపాయింట్మెంట్

ఈమధ్యన రెగ్యులర్ చెకప్ కోసం , డాక్టర్ అపాయింట్మెంట్ తీసుకోవలసి వచ్చింది. అమెరికా లో డాక్టర్ అపాయింట్మెంట్ తీసుకోవడం అనేది ఒక పెద్ద ప్రహసనం.  మీకందరికీ తెలిసే ఉంటుంది, ఇండియా లో చాలా మంది డాక్టర్ లు ఉదయం 8 నుంచి 12 దాకా, మళ్లీ సాయంత్రం 4 నుంచి 8 దాకా పనిచేస్తారు. మనం ఆఫీసు లో పర్మిషన్లు, సెలవులు తీసుకోనక్కరలేదు .అమెరికా లో మాత్రం, డాక్టర్ లు  చాలా మంది 8  నుంచి 4 వరకే పేషంట్లను చూస్తారు. సరే, అవసరం వచ్చినప్పుడు తప్పదు కదా అని , ఆఫీసు లో పర్మిషన్ తీసుకుని వెళ్ళాను. 

డాక్టర్ పిలుపు కోసం ఎదురు చూస్తూ, అక్కడ నేను ఎదుర్కున్న పరిస్తితులను మీ అందరితో పంచుకోవాలనుకుంటున్నాను.  


ఫ్రంట్ డెస్క్ లో ఉన్న నర్స్ "We need latest information , because its been an year since your last visit" అంటూ  పేషంట్ హిస్టరీ ఫోరం ఇచ్చింది. ప్రతి సంవత్సరం ఇది తప్పదురా బాబూ అనుకుంటూ ఫిల్ చెయ్యడం మొదలెట్టాను. ఆ చిత్రగుప్తుడి చిట్టా  పూర్తి చేయడానికి దాదాపు ఇరవై నిమిషాలు పట్టింది. ఇక్కడో ముఖ్యమైన విషయం - అపాయింట్మెంట్ టైం కు పదిహేను నిమిషాలు మీరు లేట్ గా వెళ్ళారా, ఇక అంతే సంగతులు. బిజీ డాక్టర్ అయితే, మీ అపాయింట్మెంట్ కాన్సిల్. కానీ, డాక్టర్ గారు మాత్రం ఆయనకు వీలున్నప్పుడు చూస్తారు. అవును, అవసరం మనది మరీ. 


ఒక విషయం మాత్రం ఒప్పుకుని తీరాలి, డాక్టర్ ఆఫీసు లో వెయిటింగ్ రూం లు మాత్రం శుభ్రంగా ఉంటాయి. 
వెయిటింగ్ టైం లో చదువుకోడానికి కొన్ని మేగజైన్ లు ఉంచారు. అవి కనీసం సంవత్సరం క్రితంవి. అట్టలు చిరిగి, నలిగి పోయి , నా సహనాన్నిపరీక్షించాయి.
 అక్కడ ఒక స్పోర్ట్స్ మేగజైన్ కోసం, నాకు, ఒక చైనీస్ ముసలామెకు జరిగిన పోరాటంలో పరిస్థితుల ప్రభావం వల్ల నేను ఓడి పోవలసి వచ్చింది. పోనీలే సీనియర్ సిటిజన్ కదా అని నన్ను నేను ఓదార్చుకున్నాను. (ఇది జగన్ ఓదార్పు కాదు, నిజమైనదే).

ఇంకో వైపు రక రకాలైన రోగాలు ఎందుకు వస్తాయి, ఎలా వస్తాయి , రాకుండా ఉండాలంటే ఏమి చెయ్యాలి, లేదా చెయ్యకూడదు లాంటి వివరాలతో బ్రోషర్స్ పెట్టారు. అవన్నీ చదివారో , అవసరం లేని పరిజ్ఞానం పెరిగి, ఆ రోగాలు అన్నీనిజం గా మనకే ఉన్నాయేమోనన్నంత ఫీలింగ్ వచ్చేస్తుంది.  విషయ పరిజ్ఞానం మంచిదే కానీ, ఈ విషయం లో మాత్రం కొంత జాగ్రత్త అవసరం. అందుకే వాటి జోలికి మాత్రం వెళ్ళలేదు. 


ఇలా, దాదాపు గంటసేపు తిప్పలు పడ్డాక, కలుగు లోంచి బయటపడ్డ ఎలుక లా,ఎక్కడినుంచో నర్స్ వచ్చిడాక్టర్ పిలుస్తున్నాడని చెప్పింది. Thank GOD  అనుకుంటూ, లోపలికి నడిచాను. 

చెకప్ పూర్తయింది. అంతా శుభం. మళ్ళీ వచ్చే సంవత్సరం వరకూ ఈ వైపు వచ్చే అవసరం రాకూడదని దేవుణ్ణి ప్రార్థిస్తూ, బయట పడ్డాను. వచ్చే సంవత్సరమైనా కొత్త మేగజైన్స్ ఉంచుతారని ఆశ. 

చూద్దాం.


~ శశిధర్ సంగరాజు.

పాల్ హెన్రీ ...నోటి దురద తీరిందా?

ఆకాశం వైపు చూసి ఉమ్మేస్తే , అది మన మీదే పడుతుందన్నసత్యం..న్యూజిలాండ్ టీవీ యాంకర్ పాల్ హెన్రీ విషయం లో అక్షరాలా నిజమైంది. 

బహుశా రాత్రి హాంగోవర్ దిగలేదేమో, ఉదయం బ్రేక్ ఫాస్ట్ షోలో,

New Delhi ముఖ్య మంత్రి షీలా దీక్షిత్ పేరును వ్యంగంగా పలికి కొరివితో తల గోక్కున్నాడు. 

ఏదో, పలకడం చేతకాక పొరపాటున పలకడం కూడా కాదు, పదే, పదే దీక్షిత్ ను Dick-Shit అని పలకడం, పైపెచ్చు అదేదో పెద్ద జోక్ అయినట్లు వెటకారం గా నవ్వడం. ఈ ప్రబుద్ధుడికి గతంలో కూడా ఇలాంటి చేష్టలకు మొట్టికాయలు పడ్డాయి. అయినా ఇంకా బుద్ధి వచ్చినట్లు లేదు. 

మొత్తానికి, టీవీ యాజమాన్యమే పీకేసిందో , భారత దేశం వ్యక్తం చేసిన నిరసనకు జడిసో, లేక ప్రపంచ వ్యాప్తం గా న్యూజిలాండ్ పరువు పోతుందని భయపడో,  పాల్ హెన్రీ తన ఉద్యోగానికి రాజీనామా చేసాడు.టీవీ వాళ్ళు సంతోషం గా రాజీనామాను అప్రూవ్ చేసేసారు. 

చేతులు కాలాక, ఆకులు పట్టుకున్నట్లు, అయ్యగారు ఇప్పుడు తీరిగ్గా పశ్చాత్తాపం వ్యక్తం చేస్తున్నారు. తను చేసింది తప్పేనని, ఇకపై తానా ఉద్యోగం చెయ్యలేనని స్టేట్మెంట్లు ఇస్తున్నాడు. 

ఈ విషయం లో ఒక్క పాల్ హెన్రీ యే కాదు, పశ్చిమ దేశాలకు ఇతర దేశాలను, వారి సంస్కృతిని అర్థం చేసుకునే సంస్కారం ఇంకా అలవడినట్లు కనిపించడం లేదు. హిందూ దేవీ, దేవతల బొమ్మలను చెప్పులమీదా, అండర్ వేర్ ల మీద ముద్రించడం, ఆనక హిందూ సంస్థల నుంచి నిరసనలు ఎదురైన తర్వాత, ఆ బొమ్మలను తీసేయడం వీళ్ళకు పరిపాటే. అందరినీ పాల్ హెన్రీ గాటన కట్టేయలేక పోయినా , చాలా మంది లో ఇంకా ఈ జాత్యహంకార ధోరణి సమసిపోలేదు.

వీళ్ళందరికీ మంచి సంస్కారం అబ్బాలని మున్నా భాయ్ లాగ "గెట్ వెల్ సూన్ " కార్డులు పంపిద్దాం.
వాళ్ళ పాపాన వాళ్ళే పోతారు, మనకెందుకు  కార్డులు  దండగ అంటారా? అదీ పాయింటే.




~శశిధర్ సంగరాజు.

ఐరావతాలు

ఐరావతం అంటే, దేవేంద్రుడి వాహనమైన ఏనుగు. ఈ ఏనుగు తెల్ల గా ఉంటుంది. వాడుక బాషలో, పోషించడానికి కష్టమైన వాటిని ఐరావతాలు అని అంటూ ఉంటారు. 
ఉదాహరణకు, పాతబడి రిపేర్లు ఎక్కువగా వస్తూన్న కార్లు, స్కూటర్లు మొదలైనవి.

అలాగే, తెలుగు సినీ పరిశ్రమలో కూడా కొన్ని ఐరావతాలు ఉన్నాయి. వీళ్ళ రెమ్యునరేషన్ కళ్ళు తిరిగే స్థాయి లో ఉంటాయి. వీళ్ళ సినిమాలు ఏళ్ళ తరబడి షూటింగులు జరుపుకుంటాయి. కానీ, ఫలితం మాత్రం ఆశించిన స్థాయి లో 
ఉండట్లేదు.

ఇటీవల విడుదలైన పులి బాక్స్ ఆఫీసు దగ్గర తీవ్రంగా గాయపడింది. ఈ సినిమా కు అయిన ఖర్చు దాదాపు 25 కోట్లకు పై మాటే. తగలెట్టిన కాలం ౩ సంవత్సరాలు.  ఇక, ఈమధ్యనే విడుదలైన ఖలేజా పరిస్థితి కూడా బేజారు గానే ఉంది. ఈ సినిమా విడుదలకు ముందు ఇచ్చిన బిల్డప్ కు, రిజల్టు కు పొంతన కనిపించడం లేదు. ఈ సినిమా షూటింగ్ కూడా ౩ సంవత్సరాలు జరుపుకుంది. ఖర్చు ౩౦ కోట్లకు పైమాటే.

ఈ రెండు సినిమాలు ఆడక పోయినా, హీరోలకు వచ్చిన నష్టం ఏమీ లేదు. వాళ్ళు హాయిగా , లైన్ లో ఉన్న తమ తర్వాతి చిత్రాలు చేసుకుంటున్నారు.వీళ్ళ ను నమ్ముకుని కోట్లు పోసి సినిమా కొన్నవాళ్ళు అన్యాయమై పోతున్నారు. 
అందుకని, ఈ హీరోలు తమ రెమ్యునరేషన్ నుంచి కొంత మొత్తాన్ని నష్టపోయిన వారికి ఇవ్వాలి. (తమిళనాడు లో రజనీకాంత్ లాగ).


మీరేమంటారు...


~శశిధర్ సంగరాజు. 

జగన్ పై ఈనాడు కార్టూన్

వద్దన్నా వినకుండా, ఓదార్పు సా..గిస్తున్న జగన్ పై అధిష్టానం  చర్యలు తీవ్రతరం చేస్తోంది. జగన్ వర్గానికి చెందిన వ్యక్తులను సస్పెండ్ చెయ్యడం మొదలెట్టింది. నెల్లూరు డిసిసి అధ్యక్షుడు కోటంరెడ్డి శ్రీధర్ రెడ్డి పై వేటు లేటెస్ట్. 
ఈ నేపధ్యం లో, జగన్ లాగ దీర్గాలు తీసి మాట్లాడుతున్నట్లు  ఈరోజు ఈనాడు లో శ్రీధర్ వేసిన కార్టూన్ చూస్తే ఎవరికైనా నవ్వు వస్తుంది. కార్టూనిస్ట్ లకు ఎవరి పైన ఆయినా సెట్టైరేసే స్వాతంత్రం ఉన్నప్పటికీ, అసలే ఈనాడు, అధిష్టానం, చంద్రబాబు లపై ఛాన్స్ దొరికితే విమర్శలతో విరుచుకు పడుతున్న జగన్, అతని అనుచరుల ఎదురు దాడి ఎలా ఉండబోతోందో !


~శశిధర్ సంగరాజు.