Powered By Blogger

Wednesday, March 16, 2011

పట్టుకుంటారా...వదిలేస్తారా?

ఇరానీ హోటల్ లో ఇద్దరు:
మొదటివ్యక్తి: తెలంగాణా ఉద్యమం, ట్యాంక్ బండ్ మీద విగ్రహాల ధ్వంసం, జగన్ పార్టీ, జపాన్ సునామీ   ఈ వార్తల్లో పడి ఈ మధ్య పట్టించుకోలేదు కానీ, భాను ఏమైయ్యాడ్రా?

రెండోవ్యక్తి: ఏ భాను?

మొదటివ్యక్తి: చూసావా, నువ్వుకూడా మర్చిపోయావ్!

రెండోవ్యక్తి: ఆ..ఆ...గుర్తొచ్చింది. మద్దులచెర్వు సూరి ని  హత్యచేసాడని అనుమానిస్తున్న భాను గురించేగా...అవున్రా.. ఏమైయ్యాడంటావ్?

మొదటివ్యక్తి: ఎక్కడో మన పొలీసు బాబాయిల ప్రతిభ చూసి నవ్వుకుంటూ ఉంటాడు.

రెండోవ్యక్తి: పాపం, సూరి పోయి వంద రోజులు దాటినట్లుంది.

మొదటివ్యక్తి: అవును. ఇదంతా చూస్తుంటే ఒక విషయం గుర్తుకొస్తోంది. మేము కాలేజ్ కు వెళ్ళే దారిలో ఒక గోడ మీద ఎవరో ఎర్ర అక్షరాలతో రాసారు "పోలీసుల్లారా! బుర్ర ఉన్నది టోపీ లు పెట్టుకోవడానికి కాదు. ఆలోచించడానికి" అని. అది నిజమనిపిస్తోంది.

రెండోవ్యక్తి:  ఏమోరా బాబు! చూస్తుంటే సూరి సంవత్సరీకానికైనా పట్టుకుంటారా? లేకపోతే,  వాడి పాపాన వాడే పోతాడని వదిలేస్తారా అనిపిస్తోంది.

~శశిధర్ సంగరాజు. 

Thursday, March 3, 2011

కుయ్యో ...మొర్రో

అవును. ప్రస్తుతం నా పరిస్థితి (అంటే, నా ఒక్కడిదే కాదు, అమెరికాలో అందరిదీ) అలాగే ఉంది మరి.
పెట్రోల్ రేట్లు చుక్కలు చూపిస్తున్నాయి. మధ్యప్రాచ్యం లో విప్లవం పుణ్యమా అని పెరగడం మొదలెట్టిన పెట్రోల్ ధరలు రెండు డాలర్ల నుంచి పెరుగుతూ వచ్చి ఈరోజుకు మూడున్నర డాలర్లకు చేరుకుంది. 

దురుద్రుష్టం కొద్దీ, మా ఆఫీసు పక్కనే గ్యాస్ స్టేషన్ (అమెరికాలో పెట్రోల్ బంకును అలాగే పిలుస్తాం) ఉంది. నా సీట్ లోంచి చూస్తే స్టేషన్ ముందున్న  పెట్రోల్ ధరల బోర్డు కనిపిస్తుంది. హనుమంతుడి తోకలాగా రోజు, రోజుకు పెరిగే ధరలు చూడడం, గుండెలు బాదుకోవడమే పనిగా తయారైంది నాకు. నాకు తెలిసి చాలామంది, ఈ పెట్రోల్ వేడి తట్టుకోలేక వీకెండ్ ప్రయాణాలు కూడా ఒకటికి రెండుసార్లు ఆలోచించి మరీ ప్లాన్ చేసుకుంటున్నారు. ట్యాంక్ నింపితే పట్టుమని వారం రోజులు కూడా రావడం లేదు. 

ఈ పరిస్థితి ఇలాగే సాగితే, కార్లు మానేసి, సైకిల్ కొనుక్కోవడమో, లేకపోతే క్లింట్ ఈస్ట్ వుడ్ సినిమాల్లో లాగా గుర్రాలపై తిరగడమో తప్పేట్లు లేదు.

మొన్నీ మధ్య గుడికి వెళ్ళినప్పుడు దేవుడ్ని ప్రార్థించా.."భగవంతుడా! నా జీవితం రొటీన్ గా తయారైంది. ఏదైనా మార్పు చూపించు" అని. ఆయన ఏం విన్నాడో, ఏమో, ఉదయానికల్లా పెట్రోల్ రేట్లు పెంచేసాడు. ఈ సారి పంతులుగారితో అయినా రికమెండ్ చేయించాలి. 
~శశిధర్ సంగరాజు.